850 million so‘mgacha mukofot! Xalqaro fan olimpiada g‘oliblari uchun ajoyib yangilik

14-fevral kuni Ko‘ksaroy qarorgohida O‘zbekiston Respublikasi Prezidenti Shavkat Mirziyoyev yoshlar bilan uchrashuv o‘tkazdi. Tadbir davomida yoshlarga keng imkoniyatlar yaratish, ularning bilim va iste’dodini qo‘llab-quvvatlash masalalari muhokama qilindi.

Uchrashuv chog‘ida Prezident xalqaro fan olimpiadalarida muvaffaqiyat qozongan yoshlarni rag‘batlantirish tizimi haqida ham to‘xtalib o‘tdi. Xususan, nufuzli xalqaro fan olimpiadalarida g‘olib va sovrindor bo‘lgan o‘quvchilarga beriladigan bir martalik pul mukofoti miqdori 5 barobar oshirilishi e’lon qilindi.

Nufuzli xalqaro olimpiadalar ro‘yxati:

• Xalqaro matematika olimpiadasi (IMO)
• Xalqaro fizika olimpiadasi (IPhO)
• Xalqaro kimyo olimpiadasi (IChO)
• Xalqaro biologiya olimpiadasi (IBO)
• Xalqaro informatika olimpiadasi (IOI)

Mukofot miqdorlari

Hozirgi kunda xalqaro olimpiadalarda g‘olib bo‘lgan o‘quvchilar, ularning o‘qituvchilari va terma jamoa rahbarlari quyidagi miqdorlarda taqdirlanmoqda:

Oltin medal

• O‘quvchiga: 500 BHM (170 mln so‘m)
• O‘qituvchisiga: 450 BHM (153 mln so‘m)
• Terma jamoa rahbariga: 35 BHM (11,9 mln so‘m)

Kumush medal

• O‘quvchiga: 300 BHM (102 mln so‘m)
• O‘qituvchisiga: 250 BHM (85 mln so‘m)
• Terma jamoa rahbariga: 25 BHM (8,5 mln so‘m)

Bronza medal

• O‘quvchiga: 200 BHM (68 mln so‘m)
• O‘qituvchisiga: 150 BHM (51 mln so‘m)
• Terma jamoa rahbariga: 15 BHM (5,1 mln so‘m)

Yangilangan mukofot miqdorlari

Xalqaro fan olimpiadalarida g‘olib bo‘lgan o‘quvchilar, ularning o‘qituvchilari va terma jamoa rahbarlari uchun mukofot miqdorlari 5 baravar oshirildi. Endilikda quyidagi miqdorlarda rag‘batlantirish beriladi:

Oltin medal

• O‘quvchiga: 850 million so‘m (500 BHM × 5)
• O‘qituvchisiga: 765 million so‘m (450 BHM × 5)
• Terma jamoa rahbariga: 59,5 million so‘m (35 BHM × 5)

Kumush medal

• O‘quvchiga: 510 million so‘m (300 BHM × 5)
• O‘qituvchisiga: 425 million so‘m (250 BHM × 5)
• Terma jamoa rahbariga: 42,5 million so‘m (25 BHM × 5)

Bronza medal

• O‘quvchiga: 340 million so‘m (200 BHM × 5)
• O‘qituvchisiga: 255 million so‘m (150 BHM × 5)
• Terma jamoa rahbariga: 25,5 million so‘m (15 BHM × 5)

Bundan tashqari, Prezidentning 2024-yil 30-sentabrdagi PQ-346-son qaroriga asosan, xalqaro, respublika va hududiy fan olimpiadalarida g‘olib bo‘lgan o‘quvchilar hamda ularning murabbiylari oladigan pul mukofotlari daromad solig‘idan ozod etilgan.

Shuningdek, 2025-yil 1-yanvardan boshlab xalqaro olimpiadalarda qatnashuvchi terma jamoalar rahbarlarini rag‘batlantirish tartibi joriy qilinadi. Unga ko‘ra, jamoa rahbarlari har bir yutib olingan medal uchun quyidagicha mukofotlanadi:

• Oltin medal – 35 BHM
• Kumush medal – 25 BHM
• Bronza medal – 15 BHM

Ushbu chora-tadbirlar yoshlarning xalqaro maydondagi ilmiy muvaffaqiyatlarini yanada qo‘llab-quvvatlashga qaratilgan.